Крива Паланка, 28 март 2023 (МИА) - Млади, средношколци од Белгија, Бугарија, Германија и Северна Македонија во организација на Средното општинско училиште „Ѓорче Петров“ од  Крива Паланка ја реализираа последната мобилност од проектот: „Yes Europe III – младите студираат и работат во Европа“.

 

-Нашето училиште, СОУ „Ѓорче Петров“ како домаќин ја предводеше оваа мобилност во соработка со партнер училиштата: ​ „Атенеум“, Леувен, Белгија, Средното училиште „Елин Пелин“,  Бугарија како партнер- училишта и Стручното училиште „Карл Шилер“, од Германија, координатор на проектот. Учесниците имаа прилика да го посетат нашето училиште, компании и институции од државата кои се успешни лидери во нивните области на дејствување, од информатичката индустрија, преработувачката, производствени капацитети и погони и непосредно можеа да научат како се студира, како се бара работа и сместување во нашата држава. Дел од активностите беа посветени и на тим-билдинг, јакнење на заеднички капацитети и заедно го прославивме интернационалниот ден на среќата, информира Катерина Митовска - Наковска, професорка по македонски јазик и литература во СОУ „Ѓорче Петров“, Крива Паланка.

 

Таа истакна дека проектот во изминатите месеци на имплементација донел ново искуство за сите вклучени ученици и партнери.

 

-Нашата благодарност ја упатувам до сите компании што ги отворија своите врати и реализираа презентации за учениците, со што директно помогнаа во успешна имплементација на оваа „Еразмус плус мобилност“: Семос Едукација, Вивакс ДОО,  Скопје, „Белмондо“, Крива Паланка, Меѓународен балкански универзитет, Скопје, Факултет за туризам и угостителство, Охрид, Градски музеј, Крива Паланка и Европска куќа, Крива Паланка, додава Митовска - Наковска. ид/мд/