Пекинг, 2 декември 2024 (МИА) - Кинеските власти денеска соопштија дека го задржуваат правото да преземат контрамерки откако Литванија протера тројца вработени во кинеската амбасада во Вилнус.

-Кина силно ја осудува и решително ја отфрла оваа непотребна и провокативна акција, изјави неименуван портпарол на кинеското Министерство за надворешни работи.

Литванските власти минатата недела објавија дека ќе прогласат тројца вработени во кинеската амбасада за „непожелни во земјата“.

Литванија не наведе конкретни причини за одлуката, туку само ги наведе „активностите што ја прекршуваат Виенската конвенција и законот на Литванија“.

Односите меѓу Вилнус и Пекинг се затегнати од 2021 година, кога Литванија му дозволи на Тајван де факто да отвори амбасада во таа земја под името Тајван, а не Тајпеј, по главниот град, што е широко распространето во дипломатската практика за формално да се избегне незадоволството на Кина што го смета Тајван за своја територија.

Кинеските власти денеска ја обвинија Литванија за „поткопување на суверенитетот и територијалниот интегритет на Кина“ и за „поткопување“ на односите меѓу двете земји веќе „три години“. мс/

фото: МИА архива