Техеран, 10 декември 2024 (МИА) - Командантот на иранската Револуционерна гарда Хосеин Салами изјави дека Иран не е ослабен по падот на сојузникот Башар ал-Асад во Сирија.

- Не сме послаби, а моќта на Иран не е намалена, изјави Салами пред членовите на иранскиот парламент.

Од почетокот на сириската граѓанска војна во 2011 година, Иран и Русија му пружаа воена поддршка на Асад. Иран испрати сили на Револуционерната гарда за да го задржи сојузникот на власт и да ја одржи „оската на отпор“ против Израел и САД.

Падот на Асад го ограничи влијанието на Иран и поддршката за групите во регионот, особено за Хезболах во Либан, кој неодамна постигна примирје со Израел.

Салами изјави дека во Сирија повеќе нема ирански сили и дека „отстранувањето на ционистичкиот режим“ останува приоритет. ссм/

фото: архива