Киев, 10 јули 2023 (МИА) - Украинските трупи во неделата ја продолжија кампањата за враќање на територијата под контрола на Русија на југоисток, при што претседателот Володимир Зеленски рече дека силите на неговата земја „презедоа иницијатива“ по претходното забавување.

Руските извештаи велат дека тешки борби ги зафатиле областите надвор од источниот град Бахмут, кој беше заробен од руските платенички сили Вагнер во мај по неколкумесечни борби. Чеченскиот лидер Рамзан Кадиров изјави дека една од неговите единици била распоредена во областа.

Опремена со сè пософистицирано западно оружје по повеќе од 500 дена војна, Украина започна очекувана контраофанзива која досега беше фокусирана на заземање низа села на југозапад. Украинските сили исто така се обидуваат да ги вратат областите околу Бахмут.

Заменик-министерката за одбрана на Украина, Хана Малиар, рече дека се водат тешки борби во две области на југоисток.

„Ги консолидираме нашите придобивки во овие области“, напиша таа на Телеграм.

Малиар додаде дека „руските трупи го бранат Бахмут, додека украинските сили постигнаа извесен напредок на јужното крило на градот“.

Зеленски претходно призна дека напредокот е побавен отколку што сакал тој и неговите генерали, но рече дека украинските сили ја имаат иницијативата.

„Сите сакаме да го направиме тоа побрзо бидејќи секој ден значи нови загуби на Украинците. Ние напредуваме. Не сме заглавени“, рече тој, истакнувајќи дека армијата надминала „еден вид стагнација“ во претходните месеци.

„Сите ние би сакале да видиме спроведена контраофанзива во пократок временски период. Но, постои реалност. Денес иницијативата е на наша страна“, додаде тој.

Руското Министерство за одбрана објави дека руските сили го одбиле украинското напредување кај Бахмут и дека борбите биле отежнати „не само поради дневниот интензитет на огнот и битката, туку и поради топографијата“. паг/

Фото: МИА архива