Париз, 4 ноември 2024 (МИА) - На осум лица кои наводно му помогнале на сторителот во бруталното убиство на професорот по историја Самуел Пати денеска ќе им се суди пред парискиот суд, четири години по инцидентот.

Злосторството, класифицирано како терористички акт мотивиран од исламисти, ја шокираше Франција и предизвика меѓународен гнев.

Во октомври 2020 година, осомничениот, 18-годишник со руско-чеченско потекло, го убил и обезглавил 47-годишниот Пати во предградие на Париз. Француските безбедносни сили потоа го застрелале и го убиле напаѓачот.

Пред убиството, наставникот по историја бил цел на интернет бидејќи прикажувал карикатури на пророкот Мухамед за време на час на тема слобода на изразување.

Седум мажи и една жена се обвинети, меѓу кои и двајца пријатели на сторителот кои, според обвинението, биле запознаени со неговите планови.

Се вели дека и двајцата го придружувале при набавка на оружје, а еден, исто така, се тврди дека го однел на местото на злосторството.

Обвинет е и таткото на ученикот за кој се вели дека циркулирал обвиненија против Пати, како и човек кој наводно објавил видеа за тоа на социјалните мрежи.

Судењето се очекува да трае до 20 декември.

Пред речиси една година, во одвоен судски процес, шест ученици беа осудени пред судот за малолетници за нивната вмешаност во настаните што доведоа до крвопролевањето.

Петмина од нив добија условни казни, а еден ученик е осуден на шест месеци затвор. мс/

фото: МИА архива