Скопје, 19 март 2021 (МИА) - Претседателот на Владата Зоран Заев попладнево го прими директорот на Агенцијата за квалитет на високото образование Агим Рушити, a на средбата присуствуваше и советничката за образование на премиерот, проф. д-р Татјана Стојаноска Иванова. На средбата, како што соопшти владината прес-служба, премиерот Заев беше информиран за досегашната работа на Агенцијата за квалитет на високото образование, во рамките на која функционираат и одборите за акредитација и евалуација во високото образование. Директорот Рушити го презентирал начинот и принципите на кои функционираат одборите, нивната работа, но и предизвиците со кои се соочува Агенцијата. На средбата било потврдено дека се работи на доекипирањето на Агенцијата за квалитет на високото образование, како и на брзо формирање на Националниот совет за високо образование, што ќе придонесе за непречено и квалитетно функционирање на Агенцијата за квалитет на високото образование. мс/ац/