Штип, 14 октомври 2022 (МИА) - Штип сити мол, првиот трговски центар во Штип, е во завршна фаза и наскоро ќе ги отвори вратите за сите посетители. Отворањето е најавено на 5 ноември, а денеска од страна на инвеститорот беше организирана прошетка низ центарот за претставниците на медиуми.

Проект-менаџерот на Штип сити мол, Гоце Југов, вели дека овој нов трговски центар на граѓаните, но и на градот Штип ќе им пружи квалитетно шопинг искуство по светски стандарди, место за забава и дружење, и ќе претставува вистинска регионална атракција и место за уживање на целото семејство. Меѓу бројните иновации кои ги има молот, значително е да се спомене дека Штип сити мол е и првиот трговски центар кој има своја фотонапонска централа која ќе задоволува дел од потребите на молот со што придонесува за поповолни услови за закупците.

- Овој шопинг-центар кој ќе биде најголем и најмодерен трговски центар во овој регион, претставува двигател на економијата и ќе има значителен допринос во економско-трговски развој на градот Штип и целиот источен регион, кој опфаќа повеќе од 250 000 жители. Од самиот почеток објектот интензивно се гради, и веќе е во завршна фаза, а инвестицијата досега изнесува 10,5 милиони евра и очекуваме да биде завршена со 12 милиони евра во предвидениот рок. Во изграбата на овој центар интензивно работат од 100 до 150 луѓе секојдневно, а по отворањето дополнително ќе придонесе и за околу 300 до 400 нови директни и индиректни вработувања, вели Југов.

Марија Портарска, архитект на Штип сити мол, вели дека трговскиот центар се простира на површина од 12.780м², со околу 30 закупци, распоредени на 5 нивоа, и е најголемиот и единствен од таков тип трговски центар во Источна Македонија.

Трговскиот центар ќе нуди голем број локални и светски познати брендови на едно место, богати забавни содржини, хотел, ресторан, кафуле, брза храна, текстил, козметика, игротека, книжарница, бела техника и многу повеќе.

Лоциран е на една од најатрактивните точки во градот Штип, на самиот негов влез, Штип сити мол, заедно со хотелот и аква паркот, ќе ја збогати понудата на забавни и шопинг-содржини, привлекувајќи огромен број посетители од сите возрасти, не само од регионот, туку и од целата држава. вдј/