Софија, 22 октомври 2022 (МИА) – Демократска Бугарија одби да учествува во разговорите со Контакт групата, соопшти поранешниот претседател на државата Росен Плевнелиев по првата средба со ГЕРБ-СДС. Како што јави дописникот на МИА од Софија, партиите кои одбиваат да учествуваат во преговорите стануваат три – „Продолжуваме со промените“, „БСП за Бугарија“ и „Демократска Бугарија“. И покрај откажувањата, Плевнелиев истакна дека контакт групата е во континуирана комуникација со трите партии и изрази надеж дека тие сепак ќе седнат на преговарачка маса. „Демократска Бугарија“ ќе предложи 48-то Национално собрание на Бугарија да гласа за воена помош за Украина, најави Атанас Атанасов, кој е нејзин копретседавач. Според него, ова ќе биде тест дали ќе има евроатлантско мнозинство во бугарскиот парламент и каква влада ќе има во Бугарија. Лидерот на ГЕРБ, Бојко Борисов изјави дека треба да има Контакт група со помош на претседателот на Бугарија Румен Радев и преодната влада за усвојување на буџетот за следната година. Според него, парламентарните избори поминале, но голема е веројатноста да се одржат нови. нк/