Во Белорусија уапсени повеќе од 50 лица за коментари по убиството на агентот на КГБ
Минск, 1 октомври 2021 (МИА) - Белоруските власти уапсија повеќе од 50 лица, најверојатно поради коментари на социјалните мрежи во врска со размената на оган во која беа убиени приврзаник на опозицијата и припадник на разузнавачката служба КГБ, соопшти невладината организација „Весна“.
Групата наведува дека уапсените може да бидат обвинети за навреда на државни службеници и поттикнување „омраза во општеството“, за што им се заканува затворска казна до 12 години.
Белоруските власти во вторникот вечерта соопштија дека „екстремно опасен криминалец“ отворил оган врз безбедносните службеници кога дошле во неговиот стан, барајќи „лица вклучени во терористички активности“.
Властите наведоа дека тогаш бил убиен еден од припадниците на службата на КГБ и дека неговите колеги возвратиле и го убиле сторителот.
