Анкара, 22 август 2020 (МИА) - Турските воздушни и поморски сили денеска имаа заедничка воена вежба во Егејско Море, соопшти турското Министерство за одбрана. - Вежбата на воените авиони Ф-16 и воените бродови е со цел да се подобрат и да се одржуваат оперативните способности во тек на заеднички операции, наведе турското Министерство за одбрана на Твитер. Вежбата се одржа во време на зголемени тензии помеѓу Анкара и Атина поради истражувањето на Турција во источен Медитеран. Зоната е богата со наоѓалишта на гас, а Атина тврди дека тоа се нејзини територијални води. Грција вчера најави дека авиони ловци Ф-16 на Обединетите Арапски Емирати следната недела ќе учествуваат во заедничка воена вежба со грчката армија. ми/