Скопје, 12 септември 2025 (МИА) - Книгоиздавателството „Матица македонска“ ја објави новата поетска книга на Лили Бошевска, „Визуелни елоквенции“, за која соопшти дека е оригинален книжевно-ликовен проект.

-Секоја од песните во книгата е во дијалог со дело од ликовната уметност, од истакнати ликовни уметници од Македонија и од светот. Со тоа, најновото дело на Бошевска се вбројува меѓу оние што во македонскиот културен простор, експлицитно го поттикнуваат дијалогот на поезијата со другите, некнижевни форми на уметнички израз, докажувајќи дека делата од различни уметности можат едно со друго да се дополнуваат, оформувајќи ја големата слика за пораките и светот на творецот, наведува издавачката куќа. 

Поезијата од оваа поетска книга, се додава во соопштението, покрај мултимедијалноста остварена со дијалогот со ликовната уметност, се одликува и со силни интертекстуални, пред сѐ, хипертекстуални врски со филозофијата, историјата на книжевноста, митологијата, во потрагата по одговори на суштински прашања за човековото постоење.

- „Визуелни елоквенции“ се издвојува и со автентичноста на стилот на Бошевска, којшто ја претставува како поетеса-ерудит и промислувач. Значајно е да се напомене дека најголемиот дел од делата од ликовната уметност што се во дијалог со песните на Бошевска се од понов датум, при што во книгата се гради синтеза меѓу архаичното (митолошкото) со интертекстуалната врска во стиховите, колективното, индивидуалното и најсовременото, а притоа се понесува заклучокот дека Бошевска, всушност трага и успева да дојде до поетски одговори на веничните прашања за човекот, творецот и уметникот воопшто.

Лили Бошевска е доктор на науки, работела како новинар и уредник во телевизија, професор и стручен соработник - библиотекар, потоа и како директор во обрзовни и културни установи во Битола. Член е на Македонското научно друштво.

-Претежно пишува поезија, учествува на поетски фестивали во земјата и странство. Застапена е во повеќе домашни и меѓународни зборници, избори и антологии на поезија и проза. Автор е на неколку поетски збирки, едукативна книга за деца и роман за млади. Авторка е на голем број стручни и научни дела и трудови од областа на менаџментот, образованието и библиотекарство, соопшти „Матица македонска“. хс/вј/

Фото: Книгоиздавателство „Матица македонска“