Велешките советници во иднина ќе добиваат надомест во зависност од нивното присуството на седници
Велес 30 јануари 2020 (МИА) - Советниците да ги прифатат обврските за кои се платени без разлика дали се опозиција или власт, да бидат редовни на комисиите и седниците, а не како до сега да ја напуштаат работата, истакна претседателот на Советот на Општина Велес, Ненад Коциќ на 50-та седница каде беше формирана Работна група за подготовка на измените и дополнувањата на Деловникот за работа на Советот.
Како што информира Коциќ, целта на дополнувањата на Деловникот е да се обезбеди поефикасна работа на Совет на Општината, да се обезбеди поголемо присуство на советниците на седниците и комисиите, а тие како народни избраници да ги оправдаат паричните надоместоци кои граѓаните ги издвојуваат за нивната работа.
Тој појаснува дека дел од советниците се потпишувале за присуство и си заминувале без да присуствуваат на седниците, а за тоа примале паричен надоместок како да присуствувале. Со тоа, не ја извршувале и својата обврска како советници да учествуваат во расправите и да предлагаат решенија по разни проблеми во општината со цел подобрување на условите за живеење на граѓаните.Предлозите на Комисијата треба да бидат дадени на усвојување на Советот на Општината, а Коциќ очекува овие измени да бидат донесени за два до три месеци, за да има поефективна и поредовна работа на Советот.
Тој јавно ги повика граѓаните и здруженијата на граѓани, посебно експертите од областа на правото и локалната самоуправа,да се вклучат во промената на Деловникот.
Потенцира дека само така заеднички ќе се договорат во фазата на донесување на предлог-промените,пред донесување на финалната верзија на истиот. ад/бт/
