Болсонаро стави вето на законот за бесплатни хигиенски средства за жените
Бразилија, 18 октомври 2021 (МИА) - Бразилскиот претседател Жаир Болсонаро стави вето на законот со кој треба да се обезбедат бесплатни тампони и влошки за жените и девојчињата во училиштата.
Со месеци се дебатира за воведување бесплатни хигиенски средства во јавните училишта, во земја во која милиони жени немаат пари за лична хигиена, пишува Дојче веле.
Според претходниот извештај на УНИЦЕФ, околу четири милиони девојчиња во Бразил не одат на училиште додека имаат менструација, а една четвртина воопшто немаат пари за тампони и влошки, додека истиот проблем ги засега и жените во затворите, како и бездомничките.
Државата треба да одвои 13 милиони евра годишно за овој закон, а министерката за жени и семејство, Дамареш Алвеш ја поддржа одлуката на Болсонаро и рече: „Мораме да одлучиме, вакцинација или тампони“.
