Париз, 28 јуни 2024 (МИА) - Францускиот премиер Габриел Атал за време на дебатата го обвини својот главен противник на претстојните парламентарни избори Жордан Бардела дека толерира расистички говор во редовите на неговата крајнодесничарска партија Национален собир (РН).

Дебатата меѓу Атал, Бардела и лидерот на социјалистите Оливие Фор беше последната директна дискусија меѓу лидерите на трите спротивставени движења за иднината на Франција пред да се отворат избирачките места за првиот круг гласање во недела.

„Не можете да изградите мир и единство кога претставувате повеќе од стотина кандидати кои се обвинети за расистички изјави“, рече Атал Бардела.

Бардела, чија партија води на анкетите и првпат може да стане доминантна политичка сила во земјата, ги отфрли обвинувањата, извикувајќи дека Атал лаже.

„Не ми се допаѓа овој начин на поврзување на псевдоклимата на омраза со електоратот на Националното собрание“, рече Бардела подоцна во дебатата.

Како што наведуваат странските агенции, извештаите за напади мотивирани од раса, хомофобија и политичка припадност пред изборите ја надополнија веќе напнатата социјална клима во Франција, помалку од еден месец пред Париз да биде домаќин на Летните олимписки игри.

Сакајќи да го претстави својот левичарски сојуз, Новиот народен фронт, како алтернатива на оние кои се против про-бизнис агендата на Макрон и екстремно десничарската РН, Фор повика на промена во распределбата на богатството. Наведувајќи ги неодамнешните протести поради проблемите со трошоците за живот, како што се „жолтите елеци“ и земјоделците, како и гневот поради неодамнешното зголемување на старосната граница за пензионирање, Фор рече дека е неопходно да се спречат богатите да станат побогати за време на кризи, додека „други се борат да врзат крај со крај“.

Претходно овој месец, претседателот Емануел Макрон го распушти Парламентот и распиша избори откако неговиот центристички сојуз беше поразен на европските избори, а исходот ќе биде познат по вториот круг од гласањето на 7 јули. паг/

Фото: Јаху