Атина, 21 ноември 2022 (МИА) – Проверка на мобилните телефони на сите пратеници; одвојување на Националната служба за разузнавање од кабинетот на премиерот; укинување на противуставната одредба со која се забранува Службата за заштита на приватност на комуникациите (АДАЕ) да ги информира прислушуваните; конечната одлука за следење поради национална безбедност да ја носи тричлен судски совет и да биде информиран претседателот на АДАЕ, се дел од иницијативите и предлозите на грчката опозициска партија ПАСОК – Движење на промена за случајот со прислушувањата во Грција, јави дописничката на МИА од Атина. Лидерот на партијата Никос Андрулакис, кој како што е веќе познато, бил следен од Националната разузнавачка служба (ЕИП), а постоел обид за негово прислушување со софтверот Предатор, на денешната прес конференција на тема „Институционален одговор на нелегалните прислушувања“ презентирајќи ги предлозите рече дека „апсолутно е јасно дека правосудството треба да ги забрза процедурите, да се дознае целата вистина пред изборите за тие да се одржат со расчистена слика без сенки“. -Сите наши иницијативи и предлози имаат една и единствена цел: да се зајакне транспарентноста, отчетноста, но паралелно и справување со токсичната клима, во која континуирано инвестираат владата на Нова демократија и партијата СИРИЗА, рече Андрулакис. Истакна дека веќе предложил, претседателот на грчкиот Парламент Константинос Тасулас да преземе иницијативи и тоа да го стори во текот на оваа седмица за проверка на мобилните телефони на сите пратеници и нивните соработници, како што тоа се прави во Европскиот Парламент, „за да престанат шпекулациите, сомнежите и политичкиот свет да биде заложник на оваа ситуација“. Додаде дека истражувачкото новинарство со објавените податоци, покажува дека со софтверот Предаторот управувале грчки полицајци во зграда на Националната служба за разузнавање. -Исто така, секојдневно се објавуваат и списоци, но никој не знае со сигурност што е точно, а што не, кој оцрнува, а кој е оцрнет, кој уценува, а кој е уценет. Единствениот пат е правдата и ги повикувам сите инволвирани лица да се обратат до правдата. Под страв од осуда на европско ниво и под наш притисок, Владата донесе предлог-закон, кој и покрај некои позитивни елементи не допира до сржта на сериозните патологии на системот, рече Андрулакис, презентирајќи ги предлозите и иницијативите на ПАСОК- Движење на промена. ср/сд/