Сиднеј, 3 септември 2023 (МИА) - Австралија денеска соопшти дека ќе испрати дополнителна полиција на Соломонските Острови за да ја засили безбедноста за Игрите во Пацификот во ноември, оставајќи ги своите службеници за спроведување на законот на работа до јуни за да помогнат во обезбедувањето локални избори, објавија британските медиуми.

Зголеменото и проширено полициско присуство доаѓа како одговор на зајакнатите врски меѓу Соломонските Острови и Кина, кои потпишаа полициски договор во јули.

Австралија, Нов Зеланд и САД се загрижени дека присуството на кинеската полиција ќе го поништи долгогодишниот договор што трите земји го имаат со островската држава на Пацификот.

Соломонските Острови во петокот објавија дека ја поканиле Австралија да го продолжи своето полициско присуство, првично до декември.

-Австралија е „главен безбедносен партнер“ за островската држава на Тихиот Океан, изјави денеска портпаролот на австралиското Министерство за надворешни работи и трговија.

Австралиската полиција ќе дејствува заедно со колегите од Фиџи, Нов Зеланд и Папуа Нова Гвинеја.

-На барање на Владата на Соломонските Острови, Австралија ќе го продолжи својот придонес во меѓународните сили за помош до јуни 2024 година за да помогне во безбедноста за време на општите парламентарни избори таму, се вели во соопштението.

Австралискиот полициски контингент пристигна во декември 2020 година за да ги смири антивладините немири, додека кинеските полициски инструктори пристигнаа оваа година за да се подготват за игрите во Пацификот.

На Игрите се очекуваат повеќе од пет илјади спортисти од повеќе од дваесет земји, за кои Кина помогна во финансирањето и изградбата на стадиони и сали. мс/

фото: ЕПА