Скопје, 7 април 2021 (МИА) - Проф. д-р Јасна Богданска, проф. д-р Елена Трајковска Докиќ, проф. д-р Сашко Јовев, прим. д-р Гордана Кузмановска и прим. д-р Елизабета Зафировска се овогодишни добитници на повелбата „Трифун Пановски“ -  највисока професионална награда, што ја доделува Македонското лекарско друштво (МЛД). Сепак, како што соопшти денеска претседателот на МЛД Горан Димитров, специјалната награда ја добива Македонското здружение на инфектолози за секој поединец инфектолог како првите борбени столбови во пандемијата со КОВИД-19. -Денес е 7-ми април интернационален ден на здравјето. За жал славењето и честитките околу овој наш празник е покриен со мрачниот вел на пандемијата КОВИД-19 и Македонското лекарско друштво кое влегува во 76 година на своето постоење мораше да ги модифицира своите задачи и дејности. Со инсталацијата на модерното Веб студио минатата година се прејде на он-лајн континуирана медицинска едукација и покрај многуте стручни состаноци, вебинари беше одржан и 20-от Конгрес на Македонското Лекарско Друштво он-лајн со повеќе од 800 учесници кој е единствен во историјата на државата, соопшти Димитров. Како што додаде, Македонското лекарско друштво оддава голема почит и благодарност на сите лекари и здравствен персонал кои се вклучени во борбата со КОВИД-19. -Нашата порака и молба до вас драги колешки и колеги, продолжете да вложувате надчовечки напори во борбата против пандемијата, внимавајте на вашето здравје и на вашите најблиски во вашата професионална работа бидејќи вие сте чувари на здравјето на секој поединец во нашата држава, истакна Димитров. бт/ац/