Атина, 16 август 2021 (МИА) – Во Грција денеска истекува рокот за задолжителната вакцинација на сите вработени во центрите и институциите наменети за грижа на лица, а во спротивно, тие што ќе одбијат да се имунизираат ќе бидат на принуден, неплатен одмор, јави дописничката на МИА од Атина. Мерката беше соопштена минатиот месец и се однесува на вработените во јавните и приватните домови за нега на стари лица, во центрите за рехабилитација, во центрите за грижа на лица со инвалидитет и попреченост, во домовите за деца без родители, во институциите за згрижување на хронично болни и сл, кои до 16 август добија рок или целосно да бидат вакцинирани или да имаат примено барем една доза од вакцината. Задолжителната вакцинација се однесува на целиот персонал, на здравствениот и административниот, а за прием во центрите за кои важат одлуките, предуслов е завршената имунизација. Паралелно, конкретните центри, домови и институции, кои ќе ги прекршат правилата, предвидена е парична казна од 50.000 до 200.000 евра. Во Грција, вакцинацијата, од 1 септември ќе биде задолжителна и за здравствените работници и за административниот персонал во болниците, здравствените центри, дијагностички центри, центрите за рехабилитација, клиниките итн, без разлика дали се приватни или јавни здравствени структури. Паралелно, и понатаму е во сила одлуката во внатрешните делови на угостителските објекти влезот да е дозволен само за вакцинирани лица или оние кои прележале Ковид-19, истото важи и за ноќните клубови без разлика дали се на отворено или затворено, а се чини дека оваа мерка ќе продолжи да важи и на есен. Грчкиот премиер Кирјакос Мицотакис во четвртокот рече дека кон крајот на месецов ќе соопштат која ќе биде владината политика за затворените делови за време на есенскиот и зимскиот период, која нема да биде многу поразлична од досегашната. - Не очекувајте дека ќе има значителна разлика во нашиот пристап кон тоа кој смее или не смее да влезе во затворени простори за забава, кога ќе се вратиме во градовите и кога времето ќе почне да заладува, истакна Мицотакис на прес конференцијата во четвртокот. ср/ми/