Кичево, 13 ноември 2021 (МИА) - На крапскиот риболовен натпревар кој се одржува на Осломејско езеро од четврток до недела, се води крајно изедначена борба за врвот помеѓу риболовните друштва Мак – Дам и Урбан Карп а разликата моментално изнесува само 610 грама во полза на Мак – Дам.

Организаторите на натпреварот велат дека до последниот час од натпреварот ќе биде неизвесно кој ќе се искачи највисоко на пиедесталот. - И покрај студеното време и ниските температури во текот на ноќта, сепак следиме интересен и крајно неизвесен крапски натпревар. До денес до 18 часот, екипа со најголема тежина вкупен улов е „Мак – Дам“ со 30.870 килограми на крап. На второ место се наоѓа екипата на“ Урбан Карп“ со вкупен улов од 30,260 килограми, додека на трето место е екипата на „Хантер“ со вкупен улов од 22.410 килограми, истакна Бесмир Елези претседател на риболовното друштво и домаќин на натпреварот. Елези посочи дека вкупниот улов на овој натпревар е не што помал од претходниот. -Во двата изминати натпревари, сите риболовни друштва остварија вкупен улов од 181.369 килограми. Најголемиот примерок на крап досега уловен тежи 6.280 килограми, а просечната тежина на уловен крап во двата дена изнесува 2.667 килограми. До утре до 11 часот, кога завршува натпреварот очекуваме уште многу изненадувања и неизвеснот, додаде Елези. за/ки/