Teheran, 23 shkurt 2026 (MIA) - Protestat në universitetet në Iran kundër sistemit autoritar islamik të qeverisjes së vendit vazhduan edhe sot, për të tretën ditë me radhë, njoftoi DPA. 

Në Universitetin Al-Zahra në kryeqytetin Teheran, i cili pranon vetëm gra, studentet protestuan, publikuan aktivistët iranianë në Telegram.

Demonstrata u mbajtën edhe në Universitetin e njohur të Teknologjisë Sharif dhe në Universitetin e Teknologjisë Amirkabir në Teheran.

Në videot në mediat sociale shihen studentet që brohorasin slogane proteste kundër udhëheqjes politike. "Vdekje për Republikën Islamike", dëgjohej në njërën nga videot.

"As Gaza, as Libani, jeta ime për Iranin", brohoriste turma në një tjetër regjistrim të publikuar nga buletini studentor Amirkabir, duke iu referuar mbështetjes kontraverse të udhëheqjes iraniane për grupet militante në rajon si Hamasi dhe Hezbollahu, transmetoi agjencia gjermane.

Semestri i ri në universitete të shumta në Iran filloi të shtunën, pak më shumë se një muaj me vonesë. Universitetet fillimisht pezulluan aktivitetet e tyre pas protestave masive në fillim të janarit. 

Autoritetet bllokuan qasjen globale në internet në vend për më shumë se tre javë. Si rezultat, disa universitete rifilluan mësimet me ngjarje online.

Aparati iranian i sigurisë ka shtypur brutalisht protestat masive të fundit në vend. Sipas organizatës amerikane në Iran (HRANA), më shumë se 7.000 njerëz kanë humbur jetën, duke përfshirë mbi 200 pjesëtarë të forcave të sigurisë shtetërore.

Demonstratat, kujton DPA, të nxitura fillimisht nga kriza e madhe ekonomike, ishin më të dhunshmet në vitet e fundit.

Foto: EPA