Uashington, 11 gusht 2024 (MIA) - Fushata presidenciale e Donald Trampit, kandidatit republikan për president, ka deklaruar dje se disa komunikime të brendshme i janë hakuar dhe ka fajësuar Qeverinë iraniane për këtë incident.

Fushata e Trampit ka përmendur armiqësitë e kaluara në mes të Trampit dhe Iranit, kur e ka fajësuar Teheranin, mirëpo nuk ka ofruar ndonjë dëshmi konkrete se iranianët janë mbrapa.

Ekipi i fushatës së Trampit e ka lëshuar një deklaratë, pak pasi e përditshmja Politiko ka raportuar se ka nisur të pranojë emaila në korrik prej një burimi anonim, që i ka ofruar dokumente autentike prej operacioneve të fushatës së Trumpit, përfshirë një raport për kandidatin e republikanëve për nënpresident, J.D.Vance dhe “dobësitë e tij të mundshme”.

“Këto dokumente janë siguruar ilegalisht prej burimeve të huaja armiqësore ndaj Shteteve të Bashkuara, që kanë qëllim ndërhyrjen në zgjedhjet e vitit 2024 dhe krijimin e kaosit brenda procesit tonë demokratik”, ka thënë zëdhënësi i fushatës së Trampit, Stiven Çeung, përmes një deklarate.

Tramp ka thënë më vonë në platformën e vet sociale, Soshëll truth se, gjiganti teknologjik, Mikrosoft e ka informuar fushatën e tij se Irani ia ka hakuar njërën prej faqeve.

Ai e ka fajësuar Iranin duke thënë se ai “mund të sigurojë vetëm informacion publik”, dhe nuk ka dhënë më shumë hollësi për hakimin.

Misioni i përhershëm i Iranit në Kombet e Bashkuara, në Nju Jork, ka thënë përmes një emaili se “Qeveria iraniane, as nuk ka, dhe as nuk synon të ketë ndonjë motiv për të ndërhyrë në zgjedhjet presidenciale amerikane”.

Tramp, ish-president amerikan, ka pasur marrëdhënie të tensionuara me Iranin, sa ka qenë në pushtet.

Nën udhëheqësinë e Trampit, SHBA-ja e kanë vrarë komandantin ushtarak iranian, Kasem Sulejmani, në vitin 2020, dhe janë tërhequr prej marrëveshjes bërthamore, që kanë nënshkruar fuqitë botërore me Iranin.

“Iranianët e vërejnë që presidenti Tramp nuk do të ndalë tmerrin ndaj tyre, sikurse ka bërë në katër vjetët e parë në Shtëpinë e Bardhë”, ka thënë Çeung.

Tramp i ka mbijetuar një atentati në korrik dhe ndonëse nuk ka pasur sugjerime që i dyshuari ka qenë i lidhur me Iranin, rrjeti televiziv amerikan, CNN, ka raportuar muajin e kaluar që inteligjenca amerikane ka informacione për një komplot iranian kundër Trampit.

Teherani, në anën tjetër, i ka hedhur poshtë këto akuza. mb/