Тел Авив, 13 декември 2024 (МИА) – Израелската војска соопшти дека конфискувала проектили за време на нејзината тековна операција во Сирија по падот на режимот на Башар ал Асад.

Војската соопшти дека војниците продолжуваат да ја зајакнуваат одбраната на Израел во тампон зоната меѓу Голанската висорамнина и Сирија.

Израелските падобранци запленија противтенковски проектили и муниција во областа, се вели во соопштението. Израелските единици веќе пронајдоа различно оружје таму во последните денови.

По преземањето на власта од страна на исламистичките бунтовници во Сирија минатата недела, израелската војска распореди војници во сириската погранична област.

Меѓународната заедница го критикуваше упадот на Израел на сириска територија, но израелскиот премиер Бенјамин Нетанјаху рече дека овој потег има намера да биде привремена мерка.

Според Сириската опсерваторија за човекови права, со седиште во Велика Британија, израелската армија сега има стационирани војници на приближно 300 квадратни километри од сириската територија.

Тампон зоната во Сирија, договорена во 1974 година, опфаќа 235 квадратни километри според израелските медиуми.

Извештаите на израелските весници сугерираат дека израелските борбени трупи, исто така, повремено биле активни надвор од оваа тампон зона, пренесува ДПА. јт/