Доха, 17 декември 2024 (МИА) - Карло Анчелоти ја истакна важноста на Интерконтиненталниот куп на ФИФА за Реал Мадрид. Утре „кралевите“ ќе се сретнат со мексиканската Пачука во финалето на купот, кое ќе се одржи на стадионот Лусаил во главниот град на Катар - Доха.

-Учеството во финалето на Интерконтиненталниот куп на ФИФА го одразуваше одличниот настап од претходната сезона. Ова е еден од најважните настани. Кога ќе ја започнете сезоната, сакате да бидете таму, сакате да играте во финалето. Имавме среќа да бидеме во него поради нашиот став и решителност. Секако дека ќе се обидеме да победиме. Победата на Пачука над Ботафого беше изненадување, но тоа е доказ за силата на мексиканскиот тим, истакна Италијанецот.

Според него, секогаш е задоволство да се игра на вакви натпревари.

-Мислам дека ќе биде одлично финале за да се заврши годината. Секако, многу е важно клубот да освои уште еден меѓународен клупски турнир бидејќи имаме многу навивачи ширум светот и тие би биле среќни доколку го освоиме овој трофеј, изјави Анчелоти за официјалниот сајт на ФИФА.

Како играч на Милан, тој двапати го освои Интерконтиненталниот куп. дс

Фото: Архива