Филиповски: Садењето нови дрвја и уредувањето на јавниот простор се нашите приоритети
- Со садење ново зеленило и украсни растенија денеска продолжија активностите на Александар Филиповски, кандидат за градоначалник на Општина Аеродром на СДСМ и коалицијата и кандидатите за сов
![Филиповски: Садењето нови дрвја и уредувањето на јавниот простор се нашите приоритети](https://new.mia.mk/index.php/images/20221108201607_big_730x400_45.webp )
Скопје, 14 октомври 2021 (МИА) - Со садење ново зеленило и украсни растенија денеска продолжија активностите на Александар Филиповски, кандидат за градоначалник на Општина Аеродром на СДСМ и коалицијата и кандидатите за советници.
Тие ја посетија населбата Ново Лисиче, каде што уредија јавен простор во близина на Спомен - паркот на нашата музичка легенда Тоше Проески.
- Преку оваа еко – акција покажуваме како ќе работиме во следните четири години. Садењето на нови дрвја и уредувањето на јавниот простор се нашите приоритети. Аеродром е општина која е позната по маалските паркови, тоа се површините меѓу зградите, каде што граѓаните често се рекреираат и меѓусебно се дружат. Овие простори дополнително ќе ги раззелениме и ќе поставиме системи за наводнување, со цел функционален зелен простор и вистински маалски соживот, изјави Филиповски.
Тој посочи дека локалната самоуправа континуирано ќе организира вакви акции за раззеленување или за чистење, на кои ќе бидат вклучени администрацијата, но и младите од основните училишта, заинтересирани претставници на приватниот сектор и граѓанските организации. Основната цел е подигнување на јавната свест кај сите локални чинители.
Филиповски истакна дека зелената агенда е на прво место во програмата на СДСМ и коалицијата „Најдоброто за Аеродром“.
Тој најави дека во претстојните четири години во општина Аеродром ќе бидат засадени повеќе од 5.000 дрвја.
- Исто така, предвидено е и затворање на Усјанскиот канал, со што ќе се реши голем еколошки проблем за лисичани. За граѓаните од Долно и Горно Лисиче ќе се доделуваат и субвенции за замена на нееколошките начини на загревање, потенцира Филиповски.фф/дма/