Делчево, 18 ноември 2021 (МИА) - Преку петиција жител на Делчево бара уредување на просторот спроти полицијата на булевар „Македонија“ и негова пренамена во паркинг и урбано катче. Петицијата како што информира подносителот Зоран Македонски е продолжување на неговото барање од 2017 година и е поддржана со над 200 потписи од граѓани на Делчево. - На 17 декември 2017 година имам собрaно 210 потписи од граѓани на Општина Делчево, за уредување на земјиште спроти полицијата во Делчево, земјиште кое што треба да се уреди како парк и паркинг простор кое што е потреба за сите граѓани на Општина Делчево. За таа петиција до ден денеска немам одговор и затоа прашувам  како планираат надлежните да го решат проблемот со метежот во сообраќајот на булевар „Македонија“, која е на магистрала на која не смеат да се паркираат возила, рече Македонски. Тој додава дека оваа петиција е внесена и заведена со архивски број и планира да побара нејзина реактивација, со цел да се постапи по иницијативата за изградба на паркинг простор. Од Општината пак, велат дека се работи по приоритети и план, уверуваат дека кога ќе се создадат услови ќе се реши и тоа прашање. вс/свс/