Пендаровски им го честита Божик на католичките верници
- Претседателот на државата Стево Пендаровски упати честитка до Киро Стојанов, скопски бискуп и струмичко-скопски епарх, и до сите католички верници кои го прославуваат Христовото раѓање - Божиќ.
![Пендаровски им го честита Божик на католичките верници](https://new.mia.mk/index.php/images/20231224152109_big_730x400_72.webp )
Скопје, 24 декември 2023 (МИА) - Претседателот на државата Стево Пендаровски упати честитка до Киро Стојанов, скопски бискуп и струмичко-скопски епарх, и до сите католички верници кои го прославуваат Христовото раѓање - Божиќ.
-Дозволете ми, на сите христијански верници кои го прославуваат Божиќ според Грегоријанскиот календар, да ви го честитам големиот празник и да ви посакам празничните денови да ги поминете пред се во добро здравје, во мир, хармонија и љубов, исполнети со радост и среќа, пишува во честитката на Пендаровски.
Божиќ како еден од најголемите и најсветлите христијански празници, посочува претседателот, „ни носи верба и надеж исполнувајќи ги нашите домови со топлина, а нашите срца со љубов“.
-Токму на денот на Христовото раѓање да ја покажеме нашата добродетел и да бидеме солидарни и грижливи за нашите блиски. Да си даруваме љубов и внимание и да се почитуваме и помагаме. Само сплотени и со длабока меѓусебна почит и заедништво ќе постигнеме просперитет и напредок на македонското општество. Христос се роди. Нека ни е честит Божиќ!, пишува во честитката на претседателот Пендаровски. хс/ цр
Фото: МИА архива