Најголемо распоредување на индиски сили во регионот
- Индија распореди десетина воени бродови источно од Црвеното Море за да осигура безбедност од пирати и да спроведе инспекција на повеќе од 250 бродови, соопштија индиските власти.
![Најголемо распоредување на индиски сили во регионот](https://new.mia.mk/index.php/images/20240131171348_big_730x400_74.webp )
Њу Делхи, 31 јануари 2024 (МИА) - Индија распореди десетина воени бродови источно од Црвеното Море за да осигура безбедност од пирати и да спроведе инспекција на повеќе од 250 бродови, соопштија индиските власти.
Индија не се приклучи на оперативната група која се бори против Хутите, предводена од САД на Црвеното Море и нема воени бродови таму, но во моментов има два воени брода на линијата на фронтот во Аденскиот Залив и најмалку десет воени бродови во северното и западното Арапско Море, како и летала за надзор, соопштија индиските власти.
Министерот за надворешни работи Субрамањам Џаишанкар рече дека растечката способност, интересите и угледот на Индија ја оправдуваат нејзината помош во тешки ситуации.
„Нема да се сметаме за одговорна земја кога во соседна земја ќе се случат лоши работи и ќе кажеме „Немам ништо со ова“, изјави тој синоќа.
Други земји, исто така, имаат поморско присуство во регионот, вклучувајќи ги САД, Франција и Кина, но индиските власти велат дека присуството на Индија е најголемо.
Индиските воени и одбранбени претставници рекоа дека поморскиот персонал, вклучително и командоси, пребарале повеќе од 250 бродови и чамци во изминатите два месеци, качувајќи се на повеќе од 40 од нив, откако пиратите ги продолжија своите напади по шестгодишна пауза.
Индиската морнарица регистрирала најмалку 17 киднапирања, обиди за киднапирање и сомнителни пристапи од 1 декември, велат тие.
Јеменските милитанти Хути од ноември напаѓаат бродови во Црвеното Море, каде што се одвива околу 12 отсто од светскиот поморски сообраќај, во, како што велат, напорите да ги поддржат Палестинците во нивната војна со Израел. ссм/
фото: ЕПА архива