25 декември 2024

Скопје - Екипите на Општина Ѓорче Петров од раните утрински часови се активно ангажирани за расчистување на патиштата кон Кучково и Грачани.  Надлежните служби се грижат за безбедноста и непреченото движење на граѓаните.

Како што информира Општина Ѓорче Петров, градоначалникот Александар Стојкоски истакна дека безбедноста и удобноста на жителите се врвен приоритет за општината и дека службите остануваат на терен се додека целосно не се обезбеди нормално функционирање на сообраќајот.

Скопје - Екипи на зимската служба на Град Скопје и ЈП „Улици и патишта“- Скопје во текот на изминатата ноќ почнале со активностите за чистење снег и фрлање сол на сите булевари и критични точки во градот.

Од ЈП „Улици и патишта“- Скопје денеска соопштија дека е интервенирано со фрлање 45 тони индустриска сол на сите критични црни точки и на поголемите булевари и улици во градот со седум специјални возила на Град Скопје.

Охрид - Граѓаните на Охрид и околината се загрижени заради негативните ефекти предизвикани од дивите депонии во градот и неговата околина. Тоа го покажуваат резултатите од јавното истражување што во текот на месецот што изминува  го спроведоа активистите на Групацијата еколошки здруженија „Збогум Буково“, креирана со цел решавање на проблемот со третманот и одлагањето на комуналниот отпад во охридскиот регион, како и затворање на неуредената и нестандардната депонија „Буково“.

Според резултатите од анкетата, дури 95 отсто од испитаниците изразиле голема загриженост од негативните ефекти на неправилното и неселективното третирање и депонирање на комуналаниот отпад во регионот.

Скопје - ЈП Водовод и канализација - Скопје соопшти дека денеска поради уличен дефект ф-80 на бул. „12-та Македонска Бригада“ 24 а, прекинато водоснабдување ќе имаат корисниците на дел од булеварот и дел од ул. „Мите Богоевски“.

Водоснабдувањето ќе биде прекинато од 10:40 часот до завршување со санација на дефектот

Скопје - Образовниот процес во сите 10 основни училишта во Карпош во кои учат учениците од прво до петто одделение, целосно се одвива согласно новата концепција за основно образование која беше донесена во 2021 година, подразбирајќи активно вклучување на основците во информатичкото современо општество. Поточно, сите образовни установи од Карпош, во рамки на своите училници за одделенска настава располагаат со интерактивни смарт табли и интерактивни панели. Според тоа, логично е дека во сите основни училишта на територија на локалната самоуправа е обезбедена интернет врска со соодветна ИТ инфрастуктура.

По тој повод денеска градоначалникот Стевчо Јакимовски направи обиколка на ООУ „Владо Тасевски“, каде непосредно присуствуваше на одделенската настава која се одвиваше во рамки на оваа образовна институција. Во оваа пригода првиот човек на Општина Карпош најави дека во текот на 2025 година, локалната самоуправа ќе продолжи со доопремување на сите училници каде учат основците од шесто до деветто одделение, односно дека ќе бидат набавени уште 84 интерактивни табли кои ќе бидат распоредени во работните кабинети по предметна настава.

Скопје - Без вода денеска од 10 часот се дел од жителите на Општина Сопиште, лоцирани на улиците „27“,„29“,„33“ и „35“.

Како што соопшти ЈП „Водовод и канализација“ -  Скопје, прекинот е поради дефект на улицата „35“ број 9 во Сопиште. Водоснабдувањето ќе биде прекинато до санирање на дефектот.

Скопје - Децата на вработените и советниците во Општина Ѓорче Петров денеска добија новогодишен подарок од општината – изведба на преубавата божиќна претстава „12 божиќни денови“ на МНТ, како и новогодишни пакетчиња во пресрет на празничните денови.

Пакетчињата им ги подели лично Дедо Мраз, а тие му ги кажаа своите најискрени желби за следната година. Сите заедно, со многу позитивна енергија, го поздравија новогодишниот момент, надевајќи се дека 2025-тата година ќе биде година исполнета со успех, здравје и многу магија.

Куманово - Плинска боца предизвикала пожар во семејна куќа во Куманово, опожарен бојлер зафатил и кровна конструкција на куќа во Черкези, соопштија денеска од Регионалниот центар за управување со кризи Куманово.  

- Пожарникарите интервенирале на опожарена плинска боца во семејна куќа на улица „Народна Револуција".  Интервенирано во 10: 20 часот со едно  возило и петмина пожарникари .Зафатена била една соба од објектот при што е направена материјална штета која допрва ќе се утврдува, соопшти РЦУК.

Скопје - ЈП Водовод и канализација - Скопје информира дека денеска поради уличен дефект ф-100 мм ул. „Атанас Бабата“ 105, прекинато водоснабдување ќе имаат корисниците од улиците „Атанас Бабата“, „Алберт Станиќ“ и „Јосиф Михајловиќ“, во општина Чаир.

Водоснабдувањето ќе биде прекинато од 09:00 часот до завршување со санација на дефектот. 

Скопје - На Попова Шапка утрово се измерени - 5 степени Целзиусови, а 4 во Гевгелија. Најмногу снег со 54 сантиметри има во Маврови Анови, додека за изминатите 24 часа до 07 часот најмногу дожд 12 литри на метар квадратени во Крива Паланка.

УХМР соопшти дека се измерени -4 степени во Маврови Анови и Крушево, -1 Претор и Виница, 0 Тетово, Штип, Куманово, Охрид, Битола, Прилеп, Берово и Крива Паланка, 1 степен Демир Капија, Скопје-Петровец и Струмица.