Скопје, 19 септември 2023 (МИА) - Градоначалникот на Општина Центар, Горан Герасимовски, денеска додели 110 решенија на барателите за остварување на правото за користење на парична помош за новороденче.

Општина Центар оваа помош ја доделува редовно во рамките на проектот на општината за првична помош и поддршка на родителите кои се жители на општината и имаат принова во семејството.

На семејствата, Герасимовски покрај решенијата им подели пригодни подароци од компаниите Хип, Геопром, Европа Лек Фарма и Веледа, како и бесплатни педијатриски услуги од Клиника Жан Митрев.

- Дечињата се наша најголема радост. Приновата во семејството значи нова среќа, нов мотив да работиме и истваруваме повеќе за нивна подобра иднина. Затоа наша задача е да направиме поубаво и подобро општество за сите нови генерации во општината, истакна Герасимовски.

Тој нагласи дека неговата заложба како градоначалник е да инвестираме во детската заштита и создавање подобри услови за нега, образование и воспитание.

 - Мило ми е што денеска запознав дел од нашите најмлади сограѓани, им посакувам добро здравје и среќно и безгрижно детство, изјави Герасимовски на доделување на решенијата.

За добивање на парична помош за новороденче, според Правилникот, потребно е да се поднесе барање, а во прилог да се достават на увид фотокопија од важечки лични карти или пасош за лична идентификација со адреса на живеење или престојување во Општина Центар, фотокопија од извод од Матична книга на родените за новороденчето и фотокопија од трансакциска сметка на барачот на оваа помош. Рокот за поднесување на барањето е до 6 месеци од денот на раѓањето на новороденчето.

Со оваа активност, Општина Центар покажува грижа за најмладите жители, бидејќи децата се најголемата радост за секое семејство.

Општина Центар и понатаму ќе продолжи да реализира проекти од областа на детската заштита и да се грижи за најмладите кои претставуваат најголема радост за секое семејство. Согласно Правилникот за добивање на парична помош за новороденче, рокот за поднесување на барањето е шест месеци од денот на раѓањето на новороденчето. сан/дма/

Фото: Општина Центар