Двајца загинати во тропската бура во Јапонија, 130.000 домови без струја
- Две лица загинаа, а повеќе од сто се повредени во тропската бура што донесе обилни дождови низ Јапонија, го парализираше сообраќајот и остави илјадници домови без струја, соопштија денеска вл
![Двајца загинати во тропската бура во Јапонија, 130.000 домови без струја](https://new.mia.mk/index.php/images/20221113223643_big_730x400_49.webp )
Токио, 20 септември 2022 (МИА) - Две лица загинаа, а повеќе од сто се повредени во тропската бура што донесе обилни дождови низ Јапонија, го парализираше сообраќајот и остави илјадници домови без струја, соопштија денеска властите.
Агенцијата за управување со пожари и катастрофи соопшти дека загинатите биле пријавени вчера во префектурата Мијазаки на главниот јужен остров Кјушу. Еден маж бил пронајден во потопен автомобил на фарма, а друг под одрон.
Министерството за економија и индустрија, пак, соопшти дека повеќе од 130.000 домови, главно во областа на островот Кјушу, и денеска се без струја.
Сообраќајот денеска главно се нормализира бидејќи луѓето се вратија на работа по продолжениот викенд. Брзите возови и најголемиот дел од копнениот сообраќај продолжија да сообраќаат, но десетици летови беа приземјени во североисточна Јапонија.
![јапонија бура](/articles/images/%d0%b4%d0%b2%d0%b0%d1%98%d1%86%d0%b0-%d0%b7%d0%b0%d0%b3%d0%b8%d0%bd%d0/u3XUx9M38/placeholder.webp?use_watermark=0)
Нови штети се пријавени во јужниот дел на Јапонија каде тајфунот Нанмадол удри во текот на викендот пред да ослабне додека се движеше кон север.
На островот Танегашима, јужно од островот Кјушу, оштетен е ѕидот на вселенскиот центар на Агенцијата за воздухопловство и истражување, соопшти Министерството за економија и индустрија. Се проценува степенот на штетата на објектот каде што се склопуваат ракетите. паг/