Bruksel, 21 tetor 2023 (MIA) - Komisioni Evropian ka përgatitur një sërë rekomandimesh për vendet anëtare të BE-së për t'u ndihmuar në koordinimin e përgjigjes së tyre ndaj përhapjes së përmbajtjeve të paligjshme dhe terroriste ose gjuhës së urrejtjes në hapësirën digjitale, para se ky fenomen të bëhet kërcënim serioz për sigurinë publike.

Qëllimi i rekomandimeve, siç lajmëroi korrespondenti i MIA-s në Bruksel, është që vendet anëtare të kontribuojnë në përpjekjet e Komisionit Evropian për harmonizimin e plotë të "platformat shumë të mëdha në internet" me detyrimet e tyre të reja nga Ligji për shërbime digjitale (MSA).

Komisioni konsideron se në kontekstin e "periudhës së pashembullt të konfliktit dhe jostabilitetit që ndikojnë në Bashkimin Evropian, së pari me luftën agresive ruse kundër Ukrainës dhe tani me sulmet terroriste nga Hamasi ndaj Izraelit", vendet anëtare duhet të bashkojnë forcat për të mundësuar zbatimin e shpejtë të Ligjit për shërbime digjitale.

Ky Ligj vendosë një sërë rregullash që synojnë të sigurojnë mjedis të sigurt, të parashikueshëm dhe konfidencial onlajn në BE, të bazuar në respektimin e të drejtave themelore, në veçanti të lirisë së shprehjes dhe informimit.

Me MSA-në, e cila hyri në fuqi në gusht të këtij viti, rrjetet sociale Facebook, Instagram, Ticktock, X (më parë Twitter), YouTube, Snapchat, Linkedin dhe Pinterest, pastaj Amazon, Booking, AliExpress, Zalando, Google Shopping, Google Src, Google Maps, Bing, Wikipedia, si dhe dyqanet e aplikacioneve në internet të Google dhe Apple, të cilat kanë marrë shenja të "platformave shumë të mëdha në internet", duhet të vendosin masa për të zbutur rreziqet specifike sistemore që i bartin sistemet e tyre, duke përfshirë rreziqet që vijnë nga përhapja e përmbajtjes së paligjshme.

Në kontekstin e rekomandimeve të përgatitura, Presidentja e Komisionit Evropian Ursula fon der Lajen vlerësoi se ato do të ndihmonin në koordinimin e përgjigjeve të BE-së dhe shteteve anëtare ndaj përmbajtjes së paligjshme dhe dezinformatave dhe mbrojtjen e shoqërisë evropiane.

"Sulmi terrorist i Hamasit, ka rezultuar në sulme në internet me përmbajtje të neveritshme dhe të paligjshme që promovojnë urrejtje dhe terror", bëri të ditur Fon der Lajen.

Megjithatë, sipas saj, me Ligjin për shërbime digjitale, BE-ja ka rregulla të forta për të mbrojtur përdoruesit, duke përfshirë grupet e rrezikuara të popullsisë, nga frikësimi, si dhe për të siguruar liritë themelore në internet.

"Platformat e mëdha i nënshtrohen detyrimeve të reja për të zbutur rreziqet e tilla nga shërbimet e tyre", shtoi Fon der Lajen.

Anëtaret e BE-së kanë pasur periudhë për të përshtatur legjislacionin e tyre me dispozitat e DSA-së, ndër të cilat një nga kërkesat është formimi i organit të pavarur për monitorimin e përmbajtjeve në internet. Me rekomandimet, KE u sugjeron anëtarëve të formojnë tashmë atë organ të pavarur, si pjesë e rrjetit të koordinatorëve potencial të shërbimeve digjitale.

Komisioni propozon edhe vendosjen e mekanizmit për t'iu përgjigjur incidenteve të shkaktuara nga përhapja e përmbajtjes së paligjshme në internet, veçanërisht kur ato paraqesin rrezik të qartë të frikësimit të grupeve të popullsisë ose destabilizimit të strukturave politike dhe shoqërore në Bashkimin.

Mekanizmi do të përfshijë takime të rregullta për t'iu përgjigjur incidenteve në mënyrë që të bisedohet për vendosjen e praktikave dhe metodologjive të mira dhe raportimin dhe shkëmbimin e rregullt të informacioneve të mbledhura në nivel kombëtar. Informacionet e këtilla mund të sigurojnë prova për Komisionin në ushtrimin e autorizimeve të tij mbikëqyrëse dhe hetimore në përputhje me DSA-në.

“Atje ku rrethanat e jashtëzakonshme, të tilla si konflikti i armatosur ndërkombëtar ose sulmet terroriste, e justifikojnë atë, Komisioni inkurajon platformat shumë të mëdha onlajn dhe kërkuesit shumë të mëdhenj onlajn të hartojnë protokollet e incidenteve, relevante për incidentin konkret”, bëhet e ditur në rekomandimet.

KE kujton gjithashtu edhe mundësitë e përdorimit të autorizimeve që rrjedhin nga instrumentet tjera të legjislacionit të Bashkimit Evropian për t'u përballur me përmbajtjet e paligjshme, duke përfshirë Rregullativën për trajtimin e përhapjes së përmbajtjes terroriste në internet, e cila ka qenë në fuqi që nga qershori i vitit 2022.

Komisioni, bën të ditur se do të vazhdojë të mbështetet në strukturat ekzistuese, siç është Protokolli i krizës i BE-së që koordinon përgjigjet ndaj zhvillimeve onlajn që rrjedhin nga aktet terroriste ose ekstremiste të dhunshme, si dhe në vendimet e Samitit të thirrjes për aksion nga Krajstçërç dhe Forumit Global të Internetit për Luftimin e Terrorizmit.

Rekomandimet do të vlejnë deri më 17 shkurt të vitit 2024, kur duhet të fillojë zbatimi i plotë i dispozitave të përcaktuara në DSA.

Javën e kaluar, në kuadër të Grupit të nivelit të lartë për luftimin e gjuhës së urrejtjes dhe veprave penale të motivuara nga urrejtja, përfundoi diskutimi i iniciuar nga Komisioni Evropian mbi nevojat për sendërtim dhe harmonizim të Kodit të sjelljes për përballje me gjuhën e urrejtjes dhe intolerancës me dispozitat e Ligjit për shërbime digjitale të BE-së.

Qëllimi i nismës është të përpilojë Kod të ri të sjelljes+, me të cilin do të forcohej lufta kundër gjuhës së urrejtjes në internet dhe i cili do të ishte vegël që jo vetëm që do të ishte reaktive dhe e përqendruar në heqjen e përmbajtjes së gjuhës së urrejtjes, por edhe do të inkurajonte platformat onlajn për të përmirësuar parandalimin dhe parashikimin e kërcënimeve eventuale.

Në përputhje me dispozitat e DSA-së, Komisioni Europian këtë javë i dërgoi kërkesa zyrtare Metës dhe TikTok për të dorëzuar informacione mbi masat që i kanë ndërmarrë për harmonizimin e tyre në përputhje me detyrimet që i kanë në përputhje me ligjin.

Nga Meta, KE kërkoi informacion mbi detyrimet në lidhje me vlerësimin e rrezikut dhe masat për mbrojtjen e integritetit të proceseve zgjedhore, si dhe në raport me zbutjen e përhapjes së përmbajtjes së paligjshme dhe dezinformatave pas sulmeve terroriste të Hamasit ndaj Izraelit.

Nga ana tjetër, nga TikTok-u janë kërkuar informacione për detyrimet në lidhje me vlerësimin e rrezikut dhe masave për zbutjen e përhapjes së përmbajtjeve të paligjshme, terroriste dhe të dhunshme, gjuhën e urrejtjes dhe dezinformatat, si dhe për dispozitat në lidhje me mbrojtjen onlajn e të miturve. 

Të dy kompanitë duhet t'i dorëzojnë informacionet e kërkuara në lidhje me shpërndarjen e përmbajtjes së paligjshme dhe dezinformatave në Komisionin Evropian deri më 25 tetor. Përveç kësaj, deri më 8 nëntor, Meta duhet të dorëzojë informacionet e kërkuara për mbrojtjen e integritetit të zgjedhjeve, ndërsa TikTok për mbrojtjen e të miturve.

Në bazë të përgjigjeve të marra për informacionet e kërkuara, Komisioni Evropian mund të fillojë hetime zyrtare kundër kompanive për mosrespektimin e dispozitave të DSA-së. KE-ja, gjithashtu, ka të drejtë t'u shqiptojë dënime kompanive për informacione të pasakta, të paplota ose të gabuara, të dorëzuara si përgjigje ndaj kërkesave për informacione. Në rast se nuk merr përgjigje për kërkesat deri në afatin përfundimtar, Komisioni mund të përcaktojë gjoba për to.

Pasi kanë marrë statusin e “platformave shumë të mëdha onlajn”, rrjetet sociale Facebook dhe Instagram të Meta dhe TikTok është dashur të respektojnë plotësisht dispozitat e DSA-së, duke përfshirë ato që lidhen me vlerësimin dhe zbutjen e rreziqeve që lidhen me përhapjen e përmbajtjes së paligjshme dhe dezinformatave dhe me çfarëdo efekti negativ mbi të drejtat themelore.

Paraprakisht, njoftim të ngjashëm u dërgua në Iks (ish Twitter) duke kërkuar që kompania të informojë KE-në me masat që ka ndërmarrë kundër përhapjes së përmbajtjes së paligjshme dhe dezinformatave.

Komisioneri evropian i Tregut të Brendshëm, Tieri Breton madje paralajmëroi pronarin e Iks, Elon Musk se platforma është e vërshuar me dezinformata në lidhje me luftën në Izrael. "Pas sulmeve terroriste të Hamasit në Izrael, ne kemi indikacione se platforma juaj po përdoret për të përhapur përmbajtje të paligjshme dhe dezinformata në BE. Më lejoni t'ju kujtoj se ka detyrime shumë të sakta për redaktimin e përmbajtjeve sipas Ligji për shërbime digjitale", bëri të ditur Bretoni në letrën drejtuar Maskit .

foto: arkivi i MIA-s