Куманово, 23 декември 2024 (МИА) - Градоначалникот на Општина Куманово Максим Димитриевски денеска беше во посета на Општата болница во Куманово и им подари новогодишни пакетчиња на децата сместени на детското одделение во оваа јавна здравствена установа.

Димитриевски им посака добро здравје, остварување на најголемите желби, како и среќно детство, исполнето со радости и успеси.

- Сакам да се заблагодарам на директорот, на персоналот, да посакам што помалку интервенции наредната година, рече Димитриевски.

Директорот на Општата болница Куманово Стефан Трајановски се заблагодари за посетата, истакнувајќи дека имаат добра соработка со Општината која има разбирање за потребите на установата која пружа здравствени услуги на регионот.

- Активно се вклучени и информирани за потребите на нашите планови за реконструкција, изјави Трајановски.

Началничката на детското одделение д-р Маргица Арсовска рече дека во моментов на одделот се сместени околу десет деца и над 15-тина на дневна болница. ам/мд/

Фото: Општина Куманово