Мадрид, 14 февруари 2024 (МИА) - Шпанија и Ирска побараа од Европската унија „итно“ да испита дали Израел ги исполнува своите обврски за почитување на човекови права во Газа. Шпанскиот и ирскиот премиер Педро Санчез и Лео Варадкар испратија писмо до Европската комисија во кое ја повикуваат „итно да дејствува по кризата во Газа“.

-Со оглед на критичната ситуација во Рафа, Ирска и Шпанија побараа од Европската комисија итно да разгледа дали Израел ги исполнува своите обврски за почитување на човековите права во Газа, напиша Санчез на „Х“.

Повеќе од 1,4 милиони Палестинци се заробени во јужниот град Рафа додека израелските војници се подготвуваат за целосна копнена операција што предизвика меѓународна тревога за можни масовни жртви.

Во писмото, двајцата лидери бараат „итно преразгледување дали Израел ги исполнува своите обврски, вклучително и со Договорот за асоцијација ЕУ/Израел, во кој се почитувањето на човековите права и демократските принципи како суштински елемент на односите“.

Договорот за асоцијација е главната основа за трговските врски на блокот со Израел. Потпишан во 1995 година, стапи на сила во 2000 година.

-Доколку смета дека (Израел) прекршува, Комисијата треба да му предложи на Советот „соодветни мерки за разгледување“, се вели во писмото. мс/