Турски обвинител побара да му се забрани политичка активност на градоначалникот на Истанбул, Имамоглу
- Турски обвинител денеска побара од судот да го осуди и да му забрани занимавање со политика на градоначалникот на Истанбул, Екрем Имамоглу поради навреда на јавни функционери
![Турски обвинител побара да му се забрани политичка активност на градоначалникот на Истанбул, Имамоглу](https://new.mia.mk/index.php/images/20221114025610_big_730x400_68.webp )
Анкара, 11 ноември 2022 (МИА) - Турски обвинител денеска побара од судот да го осуди и да му забрани занимавање со политика на градоначалникот на Истанбул, Екрем Имамоглу поради навреда на јавни функционери.
Имамоглу е популарен политички ривал на турскиот претседател Реџеп Тајип Ердоган. Но, случајот е одложен до декември.
На Имамоглу му се суди поради говор од 2019 година за локалните избори, кои беа поништени. Тој тогаш изјави дека тие кои донеле таква одлука се будали.
Според анкетите Имамоглу би бил сериозен противкандидат на претседателските избори, што треба да се одржат следната година, ако одлучи да се кандидира. Опозицијата сè уште не избрала претседателски кандидат.
Судот ја одложи постапката за да го разгледа барањето на неговиот адвокат за изземање на судијата. Следното рочиште е закажано на 14 декември. Максималната казна за навреда на јавни функционери е пет години затвор.
Властите забранија протести пред судот, а полицијата ги затвори патиштата што водат до судот, што е лоциран на азиската страна на Истанбул. Повеќе од илјада поддржувачи на градоначалникот се собраа на плоштадот на околу два километри, носејќи ги знамињата на партијата на Имамоглу и извикуваа „Нема да Ве оставиме“.
Исходот од изборите во 2023 година може да зависи од тоа дали Републиканската народна партија (ЦХП) на Имамоглу и другите опозициски партии ќе ги здружат силите против Ердоган и неговата Партија на развојот и правдата (АКП), која е на власт 20 години. ми/