Њујорк, 25 септември 2024 (МИА) – Министерот за здравство и лидер на Алијансата на Албанците Арбен Таравари, кој учествува на 79.Генералното собрание на ОН, изјави дека односите помеѓу партнерите во коалицијата предводена од ВМРО-ДПМНЕ, каде што се Вреди и ЗНАМ, се коректни и дека оваа Влада ќе продолжи да функционира. Владата, вели тој, има подолгорочна стратегија, но потребна е почеста консултација и синхронизација меѓу партиите од власта.  

Како што јави известувачот на МИА од Њујорк, Таравари ова го кажа по вчерашните изјави на Халил Снопче дека Вреди ќе излезе од владината коалиција ако се изгласа законот за бранители и на премиерот Христијан Мицкоски кој му посака среќа на пратеникот доколку се случи тоа.  

- Односите помеѓу Влен и ВМРО-ДПМНЕ можам да кажам дека се доста коректни. На ниво на претседатели на партии. Нормално ние имаме структури сите партии Влен и ВМРО-ДПМНЕ. Можеби имало некаде и некое помало недоразбирање што не можам да кажам истото и за ЗНАМ и за Влен. Меѓутоа, повторно, ќе кажам односите помеѓу партнерите во коалицијата предводена од ВМРО-ДПМНЕ, каде што се Влен и ЗНАМ се коректни и ние се обидувавме да бидеме што посинхрони овие сто дена, меѓутоа некаде имало недоразбирања, некаде имало испади кои не биле координирани како што треба, затоа треба време за да се синхронизираме тотално и комплетно и тоа да се види и кај граѓаните. Меѓутоа, генерално можам да кажам дека очекувањата на граѓаните беа огромни од ова мнозинство, рече министерот за здравство.  

Не можат, посочи Таравари, да се остварат сите предизборни ветувања само за сто дена. Има постојани дефокусирања од она што е испорачувано во овие сто дена посебно во албанскиот блок. Според него, направени се огромни работи. 

- Сепак ДУИ некако успеваше со сите ресурси што ги има и финансиски и човечки да не дефокусира комплетно од тоа што е сработено и да се занимаваме со комплетно маргинални теми, кои се толку небитни за луѓето. Ние штом направиме нешто, како Влада зборувам, утредента имаш веднаш некаков дефокус кој е се испорачува од ДУИ. Јас се надевам дека со тек на времето да инсистираме што повеќе да кажеме на јавноста и на граѓаните што сме сработеле овие први сто дена но и понатаму, рече Таравари. 

Смета дека реакцијата на Снопче за законот за бранителите била, како што рече, како што треба, но се надева дека во владиното мнозинство ќе има координација и дека ќе се надмине „овој ситен проблем“. 

-Законот за бранители веќе пет пати е изгласан од 2002 година и ова е шести пат и неверувам дека ненамерно СДСМ оваа точка за бранителите прво ја испорача во февруари 2024 година кога ги разрешуваа двајцата министри Азири и Фатмир Меџити и втор пат сега токму кога беа важни точки на дневен ред во Собранието. Како вонредна точка го поставија и законот за бранители. Генерално, мислам дека кога нешто планираме да донесеме како Влада треба да бидеме синхронизирани и известени едни од други, така што и реакцијата на господинот Снопче беше во овој правец. Значи ние не сме известени, ние начелно сме против нешто да помине без да бидеме договорени меѓу нас. Реакцијата на Снопче беше како што треба и се надевам дека ќе имаме координација меѓу нас и ќе го поминеме и овој да речам ситен проблем што ДУИ се обидува заедно со СДСМ. Мислам дека се координирани да ставаат, да подметнуваат искри во функционирањето на коалицијата во владејачкото мнозинство, рече Таравари.  

Во однос на балансерот и законот за јазици вели дека тие се во Уставниот суд повеќе од пет години и оти не верува дека токму сега Судот требало да ги актуелизира овие теми.

-Само човек да биде малоумен па да верува дека баш сега во првите сто дена Уставниот суд треба да ги актуелизира овие две теми. Замислете пет години се барањата за балансерот и за употребата на албанскиот јазик, и баш сега се актуелизира и претседателот на Уставниот суд го става на дневен ред за да покаже дека ете треба нешто ново. Ние генерално сме усогласени и сме кажале дека треба закон за правична застапеност, не само на етничките заедници, туку правична застапеност на сите категории кои живеат во државата, така што ќе видиме со закон да го покриеме ова што се трга балансерот, вели Таравари. 

Укажува дека сите политички партии се свесни за злоупотребата на балансерот и дека владејачко мнозинство ќе изнајде решение за да можат припадници на сите заедници да бидат застапени во институциите. 

Партиите од коалицијата Вреди по локалните избори ќе одлучуваат дали ќе се спојат во една политичка партија. 

-Коалицијата Влен функционира меѓу себе. Идејата за спојување сме ја отвориле меѓу нас, меѓутоа има различни идеи. Едната е дека треба да функционираме како четири партии до локалните избори бидејќи така имаме четири ограноци на четири партии во сите градови, да не ни се случи ако се споиме од сега некаков негативен ефект врз ограноците. Идејата стои да се споиме после изборите. Меѓутоа повторно треба да седнеме заедно и после изборите треба да одлучиме како понатаму, вели Таравари. 

Министерот за здравство во четврток ќе се обрати на Генералното собрание на ОН на Сесијата за резистентност на антибактериска терапија, а потоа заминува во Вашингтон во посета на два универзитета за да ја разгледа можноста за соработка на медицинските факултети. 

- Јас ќе ги кажам искуствата на Република Северна Македонија и што е спроведено кај нас посебно после Ковид 19, рече Таравари. ев/лв/

ФОТО: МИА