Скопје, 3 октомври 2024 (МИА) – Пратениците во рамки на денешната 16-та пленарна седница ги изгласаа измените и дополнувањата на Законот за спречување перење пари и финансирање на тероризам и Законот за експропријација. 

Пратеникот на „Европскиот фронт“, Сали Мурати истакна дека во измените има неколку недостатоци од процедурален аспект, суштински и правни недостатоци и практични проблеми во применувањето на овие измени и дополнувања на овој Закон.

-Од процедурален недостаток е предлогот за носење по скратена постапка е неосновано, според мене, бидејќи се работи за суштински измени на Законот кои директно влијаат на правата на граѓаните. Исто така, измените не се едноставни и технички како што е согласно Деловникот. Потребна е широка јавна расправа за оваа проблематика и не е приложена анализа на примената на постојниот закон за да се пристапи кон овие измени и дополнувања . Од суштински правен аспект, недостатоците на овој закон се продолжувањето на рокот за привремен застапник заземен на четири години е предолг период и може да води кон злоупотреби. Исто така, не се прецизирани критериумите за образложен предлог при продолжување на рокот од две до четири години. И н е јасно дефинирана постапката за надомест за раскинување при раскин со спогодба што се предлага. Недостасуваат преодни одредби за веќе склучените спогодби. Како правни недостатоци, според мене, на законското решение постои неусогласеност помеѓу разни членови, рече Мурати.

Во Собранието исто така денеска беше одбележан Меѓународниот месец на борбата против ракот на дојка. Пред пратениците се обрати претседателката на Комисијата за еднакви можности на жените и мажите Жаклина Пешевска истакна дека ракот на дојка е втор најчесто дијагностициран рак кај жените по ракот на кожа, а е втор по причина за смрт од рак по ракот на бели дробови.

Таа потенцира дека честотата на оваа болест во последните 30 години расте на глобално ниво и тој пораст изнесува 3,1 проценти годишно, а морталитетот варира. 

-Истражувањата покажуваат дека во просек една до осум жени во својот живот ќе развијат рак на дојка. Околу две третини од жените се на возраст од над 55 години, а останатите се помеѓу 35 и 54 години. На светско ниво има околу 2,1 милион новодијагностицирани случаи на карцином на дојка кај жени. Но иако оваа болест е една од најсмртоносните видови на рак кај жените, оваа болест ги погодува и мажите од еден до два проценти. Напредокот на медицината, болеста рак на дојка ја класифицира во болест која се повеќе е излечива, која може да се победи доколку рано се открие. Раната дијагностицирање е можност за оваа болест да се лекува, можност за живот и затоа сите ние треба да и го посветиме потребното внимание. Редовните лекарски контроли, самоконтролите и контролите во специјализираните лекарски установи можат да ни го спасат животот, а животот не заслужува изговори, рече Пешевска. 

Пешевска со повик до жените да му го посветат потребното внимание на нивното здравје и редовните лекарски контроли да станат дел од нивниот живот. 

-Драги девојки, никогаш не е рано за да се грижите за вашето здравје. Драги сестри, жени и мајки најдете време да се грижите за себе како што се грижите за вашите сакани и не заборавајте дека секој преглед е важен, рече пратеничката Пешевска. фф/нд/

Фото: МИА архива