Прилепското обвинителство со интензивни предистражни дејства во отворениот предмет за случајот со новороденчето
- Прилепското основно јавно обвинителство интензивно работи на предистражните дејства по отворениот предмет за случајот со новороденчето, кое на 27 октомври се роди здраво во прилепската градска болница, а по три дена поради тешко дишење беше префрлено на Клиниката за детски болести во Скопје каде по една недела почина од сепса.
![Прилепското обвинителство со интензивни предистражни дејства во отворениот предмет за случајот со новороденчето](https://new.mia.mk/index.php/images/20231115141740_big_730x400_35.webp )
Прилеп, 15 ноември 2023 (МИА) - Прилепското основно јавно обвинителство интензивно работи на предистражните дејства по отворениот предмет за случајот со новороденчето, кое на 27 октомври се роди здраво во прилепската градска болница, а по три дена поради тешко дишење беше префрлено на Клиниката за детски болести во Скопје каде по една недела почина од сепса.
Според основниот јавен обвинител Стевчо Биноски, предметот е отворен по пријавата на родителите, а обвинителството ја бара целата документација за случајот од Болницата и од Клиниката.
- По пријавата на родителите ги зедовме нивните изјави за случајот, а тие ни ја доставија целата нивна документација. Го презентираа случајот, а во меѓувреме ја побаравме документацијата од прилепската болница и од Клиниката од Скопје. Дали и кој ќе повикаме да даде исказ ќе зависи од документацијата, изјави Биноски.
Директорката на прилепската градска болница, Кети Смилеска информира дека го исчекуваат барањето и секако ќе ја достават документацијата. Во меѓувреме болничката комисија за интрахоспитални инфекции побара вонреден надзор од двете одделенија - гинеколошкото и неонатолошкото и земени се брисеви.
- Од Центарот за јавно здравје од Прилеп се земени брисеви од сите предмети во одделенијата, како и од персоналот и се чекаат резултатите, како и по надзорот на Државниот здравствен и санитарен инспекторат. Документацијата е на располагање на обвинителството, изјави Смилеска. ем/цр
Фото: МИА