Приватна средба на полскиот претседател со Трамп
- Полскиот претседател Анджеј Дуда соопшти дека за време на неговата посета на Њујорк, вчера имал приватна средба со поранешниот шеф на американската држава и републикански претседателски кандидат Доналд Трамп.
![Приватна средба на полскиот претседател со Трамп](https://new.mia.mk/index.php/images/20240418095126_big_730x400_34.webp )
Вашингтон, 18 април 2024 (МИА) - Полскиот претседател Анджеј Дуда соопшти дека за време на неговата посета на Њујорк, вчера имал приватна средба со поранешниот шеф на американската држава и републикански претседателски кандидат Доналд Трамп.
Изборниот штаб на Трамп ги опиша двајцата политичари како „одлични пријатели“, се вели во соопштението за состанокот, во кое се додава дека разговарале за предлогот на Дуда земјите од НАТО да трошат најмалку три отсто од својот БДП за одбрана.
Дуда, чиј мандат истекува во 2025 година, беше еден од меѓународните партнери на Трамп кога тој беше претседател.
– Доналд Трамп ме покани во својот приватен стан, така да се каже. Ова е едноставно приватен состанок за време на мојот престој овде, во Њујорк, изјави Дуда.
Трамп, кому му се суди во Њујорк под обвинение дека го купил молчењето на порно актерката Сторми Даниелс за нивната врска, е во тесна трка против актуелниот демократ Џо Бајден пред претседателските избори во ноември.
Многу европски лидери долго време стравуваат дека новиот мандат на Трамп може да значи намалување на американската поддршка за Украина, која граничи со Полска, но и за НАТО алијансата.
„Претседателот Трамп со задоволство потсети на неговата значајна посета на Полска во 2017 година и го пофали полскиот народ за цврстата одбрана на својот суверенитет и посветеноста на заштитата на европските граници од секакви и сите закани, објави предизборниот штаб на Трамп во соопштението за печатот. ссм/
фото: ЕПА архива