Њу Делхи, 24 март 2020 (МИА) - Полицијата во индискиот град Меруту одлучи да ги казни прекршителите на самоизолација, така што ќе ги принуди да носат транспаренти на кои пишува „Јас сум му пријател на коронавирусот“, за да можат останатите граѓани да ги фотографираат и да ги објават на социјалните мрежи. Поголемиот дел од Индија, каде се регистрирани 482 заразени случаја на новиот коронавирус, а починале девет лица, е во еден вид карантин за да се спречи ширењето на Ковид-19. Полицијата покрај фотографијата на еден „прекршител“ со транспарент, напишала и „Некои луѓе не се грижат за безбедноста на општеството“. На Твитер се објавени уште девет такви фотографии со луѓе кои носеле транспаренти на хинду јазик, како на пример „Не верувам во законот на државата“, „Не сум загрижен за моето семејство и општеството“ и слично. Од полицијата во Меруту се наведува дека само луѓето кои не ги почитуваат препораките се фотографирани, а самоизолацијата е прекршена 22 пати. гт/