Кичево, 22 март 2022 (МИА) - Во изминатите три години во најстарата и најголема детска градинка во Кичево „Олга Мицеска“ променети се прозорците и вратите, поставена е нова ограда, набавени се голем број нови реквизити, опремена е сензорна соба. Најновиот зафат кој ги подобрува условите за престој на децата во градинката се патеките од бекатон плочки, кои се поставени на повеќе делови од дворот.

-Во изминатите три месеци детската градинка „Олга Мицеска“ доби нови патеки со бекатон плочки. Поставени се бекатон плочки на површина од околу 800 метри квадратни, а средствата за оваа намена ги обезбеди ЕЛС Кичево.Со овој зафат им овозможивме на дечињата во градинката во ниту еден дел од дворот да не газат кал и на сите пристапни патишта поставени се бекатон плочки, што овозможува во текот на цела календарска година приодите во градинката да бидат чисти и уредни, рече Садик Ахмети, директор на детските градинки во Кичево.

Тој потсети дека иако капацитетот на градинките во Кичево е за повеќе од 400 деца, сепак редовно во градинките се запишани околу 80 проценти од овој број.

-Причината зошто е помал бројот на деца во градинките од вистинскиот капацитет е фактот што повеќе родители последните години поради ковид-19 и други епидемии не ги пуштаат децата во градинка за што ги ангажираат своите најблиски. Ако се реализираат најавите дека за децата од 5  и 6-годишна возраст ќе биде задолжително одење во градинка, тогаш можеме да очекуваме бројот на деца во градинките значително да се зголеми, додаде директорот Ахмети. за/мд/