Скопје, 12 февруари 2026 (МИА) - Новиот член на Судскиот совет, Садула Изаири, денеска ќе даде свечена изјава пред претседателот на Собранието, Африм Гаши.

Судијата од судот во Тетово, Садула Изаири, на 30 јануари годинава освои најмногу гласови на непосредни избори за член на Судскиот совет од редот на судиите припадници на етничките заедници, кои се над 20 отсто во државата. За Изаири гласале 179 судии од вкупно 390, кои го искористиле правото на глас.

Садула Изаири за судија е избран пред 18 години. Правен факултет студирал во Приштина, а правосудниот испит го положил на Универзитетот „Св. Кирил и Методиј“ во Скопје во 2004 година.

Во текот на својата кариера, според неговата кратка биографијата објавена на веб-страницата на Основниот суд Тетово, тој работел како управител на приватна фирма во Тетово, бил секретар во Општина Боговиње, а од 2005 до 2008 година ја вршел функцијата генерален директор на „Македонска пошта“. Во 2008 година со одлука на Судскиот совет е избран за судија во Основен суд Тетово, каде што работи на предмети од кривична област.

Во делот за објавени трудови и активности за Изаири пишува дека учествува на семинари организирани од Академијата за судии и јавни обвинители. 

Изборот за член на Судскиот совет следува по истекот на шестгодишниот мандат на Ханиф Зендели од Апелацискиот суд Гостивар, кој за член на Советот беше избран на 22 јануари 2020 година. Претходно, во Советот по предлог на претседателката на државата влегоа Сузана Јошевска-Атанасовска и Арлинда Кадри-Шахиновиќ. фф/са/

Фото: Сајтот на Основен суд Тетово