Муцунски - Суриани: Да се поттикнува дијалог и да се унапредува почитувањето на религиските слободи
- Министерот за надворешни работи и надворешна трговија Тимчо Муцунски денеска се сретна со апостолскиот нунциј за Северна Македонија со седиште во Софија монсињор Лучано Суриани.
![Муцунски - Суриани: Да се поттикнува дијалог и да се унапредува почитувањето на религиските слободи](https://new.mia.mk/index.php/images/20240821150352_big_730x400_62.webp )
Скопје, 21 август 2024 (МИА) - Министерот за надворешни работи и надворешна трговија Тимчо Муцунски денеска се сретна со апостолскиот нунциј за Северна Македонија со седиште во Софија монсињор Лучано Суриани.
На средбата, како што информира Министерството за надворешни работи и надворешна трговија, беше изразено заемно задоволство од успешниот развој на билатералните односи, засновани врз значајни историски врски, споделени културни вредности и заеднички духовни традиции.
- Централно место во разговорите зазеде перспективата на меѓусебните релации и потребата од интензивирање на секторската соработка, пред сè, во сферата на културата, заштитата на културно-историското наследство, образованието и здравството, се вели во соопштението.
Министерот Муцунски ја нагласи улогата на нашата земја во промовирањето на меѓурелигискиот дијалог и почитувањето на верските слободи и се заблагодари на поддршката на Ватикан на нашиот пат кон Европската унија, која за нас е од особено значење и ќе продолжи да биде силна инспирација за нашите граѓани и патоказ во градењето просперитетно општество.
Апостолскиот нунциј, како што се наведува, изрази уверување дека и во иднина, со заеднички напори ќе продолжи да се поттикнува дијалогот, да се унапредува почитувањето на религиските слободи и да се градат нови мостови на разбирање во духот на универзалните верски традиции. мд/лв/
Фото: Министерство за надворешни работи и надворешна трговија