Атина, 26 февруари 2025 (МИА) – Мнозинството Грци сакаат вистината да блесне, правдата да биде задоволена, никогаш повеќе да не доживееме слична трагедија, рече грчкиот премиер Кирјакос Мицотакис на почетокот на денешната владина седница, осврнувајќи се на двегодишнината од железничката несреќа кај Темпи, посочувајќи дека „националната драма треба да го обединува општеството под заедничко барање за вистина и правда“, јави дописничката на МИА од Атина.

Во петок се навршуваат две години од несреќата во која животот го загубија 57 лица, поголемиот дел од нив студенти, а закажан е генерален штрајк што ќе ја парализира Грција и ќе се одржат над 300 протести во земјата и странство.

На почетокот на владината седница, Мицотакис се осврна на железничката несреќа и закажаните протестите, за кои посочи дека се уставно загарантирани право на граѓаните, но и дека државата треба да ги заштити демонстрантите, истакнувајќи и дека „и покрај оваа клима на поделеност и голема тензија“, тие се тука да ги обединат Грците.

- Задутре многу наши сограѓани ќе бидат на плоштадите во земјата за да им оддадат почит на жртвите, за да ја испратат очигледната порака дека вистината треба да блесне, а виновниците да бидат казнети, со право, од државата да побараат добар и безбеден транспорт. Сигурно одредени ќе протестираат против Владата, но државата има должност да се погрижи за секој да може да го искористи своето право на слободно изразување. Полицијата ќе биде таму за да ги заштити учесниците и уставното право за мирен собир. Тоа е позиција на одговорност што ја очекуваме и од организаторите и од учесниците, рече Мицотакис.

Паралелно додаде дека „некои се обидуваат оваа колективна жалост да ја претворат во можност за нова поделба, да ја искористат болката како средство за свои цели и тагата за трагичната несреќа да ја сведат на евтина партиска парола“.

- Инсистирам на ова, бидејќи веќе е јасен обидот на одредени кругови оваа емотивна клима да ја променат во клима на политичка дестабилизација. Го гледате и вие тоа дека ширењето непристојни пораки на интернет ги надмина сите граници и не е случајно што дел од опозицијата отиде дотаму да говори за „Влада – убиец“ или да усвојува провокативни и индикативни пароли од типот „за да дишеме, мора да ги собориме“, рече Мицотакис.

Посочи дека се должни да се спречи „доведувањето во прашање на внатрешната стабилност и нормалност во земјата“.

Мицотакис се осврна и на расправата во Парламентот закажана за следната седмица што се однесува на формирањето предистражна комисија за несреќата и посочи дека партиите ќе можат да ги претстават своите ставови, а ако сака опозицијата може да достави предлог за гласање недоверба на Владата.

Железничката несреќа кај Темпи се случи на 28 февруари 2023 година при директен судир на товарен и патнички воз, кои се движеле на истата шина во различни правци, по сударот следеше и експлозија, а животот го загубија 57 лица.

Две години подоцна, остануваат неодговорени низа прашања, а граѓаните в петок, преку протестите што се очекува да бидат масовни ќе побараат правда. ср/сд/

Фото: Кабинет на грчкиот премиер