Скопје, 12 октомври 2024 (МИА) - Министерот за социјална политика, демографија и млади Фатмир Лимани, утре и задутре во Берлин ќе учествува на Форумот за млади на земјите од Западен Балкан во рамки на Берлинскиот процес.

Лимани, како што соопшти Министерството, ќе се обрати на конференцијата насловена: „Декада на влијание: Младите го зајакнуваат регионот во рамките на Европскиот проект“, заедно со министри на Владите од шесте земји од Западен Балкан, како и на Франција и Германија и претставници на Регионалните канцеларии за младинска соработка – RYCO.

Оваа година се одбележува значаен јубилеј во историјата на нашиот регион — 10 години од започнувањето на Берлинскиот процес кој што не претставува само иницијатива, туку визија за иднината на Западен Балкан, преку промовирање на регионална стабилност, економски развој, соработка меѓу земјите и поддршка во евроинтеграциите, стои во соопштението.

Основањето на RYKO претставува особено важна платформа за младите во нашиот регион, затоа што игра клучна улога во поврзувањето на младите во регионот. И претставува  едно од најголемите достигнувања произлезени од Берлинскиот процес.

Министерот Лимани покрај учеството на панел дискусијата насловена: „Европскиот проект низ призмата на младите“, ќе оствари и повеќе билатерални средби. нд/

Фото: Министерство за социјална политика, демографија и млади