Сараево, 26 ноември 2024 (МИА) - Сараево и утрово е на високото трето место на листата на најзагадени градови во светот (IQAir), зад Лахоре (Пакистан) и Делхи (Индија). Според мерењата во 7 часот наутро, воздухот во Сараево е категоризиран како „многу нездрав“, со ПМ2,5 честички од 206, што е 26,2 пати над дозволеното ниво препорачано од Светската здравствена организација.

Загадувањето на воздухот во Сараево трае веќе неколку дена, а вчера кантоналната влада воведе мерки на „предупредување“ за жителите, особено затоа што се очекува лошата состојба да продолжи поради временските услови.

Мерките вклучуваат забрана за движење на возила со ЕУРО 2 или пониски стандарди во зоната А, како и забрана за сообраќај на товарни возила над 3,5 тони на главните градски улици, пренасочувајќи ги на алтернативни правци. Исто така, се забрануваат градежни работи на отворено, а сите објекти за производство на топлинска енергија со моќност над 50 kW мора да ја намалат температурата во загреаните простории за најмалку два степени.

Мерките предвидуваат и заштита на работниците на отворено, како и забрана за деца да престојуваат надвор за време на часовите по физичко образование и големите одмори. ссм/

фото: архива