Мајката која била алергична на своето бебе
- Лекарот ѝ препишал крема, но осипот набрзо се претворил во плускавци. Лекарите потоа ѝ ја дијагностицирале ретката автоимуна болест - пемфигоид гестационис (ПГ).
![Мајката која била алергична на своето бебе](https://new.mia.mk/index.php/images/20221112130918_big_730x400_8.webp )
Лондон, 22 февруари 2022 (МИА) - Британка раскажа како во текот на бременоста се борела со ретка болест поради којашто била „алергична“ на своето, сопствено бебе. Сепак, и бебето и мајката сега се чувствуваат многу подобро.
Сè почнало кога Фиона Хукер забележала осип на својот стомак лани во април, кога била во седмиот месец од бременоста. Лекарот ѝ препишал крема, но осипот набрзо се претворил во плускавци. Лекарите потоа ѝ ја дијагностицирале ретката автоимуна болест - пемфигоид гестационис (ПГ). Според наводите, тоа се случува кај една од 50.000 жени, а реакцијата е предизвикана од генот на нејзиниот син поради што имунолошкиот систем „ја напаѓа“ нејзината кожа.
Дерматолозите потоа ѝ препишале доза орални стероиди, кои требало да ги зема следните шест месеци.
- Сè уште понекогаш чувствувам чешање, па користам крема на база на стероиди. Моето тело сè уште е во процес на опоравување, изјави Хукер за „Индепендент“. - Истражувањата покажаа дека осипот ќе се врати во идните бремености и ќе биде многу поболен. Мислам дека не би можела повторно да минам низ сè ова, признава таа.
Иако осипот е речиси повлечен, тој сега може да се појави и од одредени хормони и, во помала мера повторно избувнува, на пр., при менструација. си/
![](/articles/images/%d0%bc%d0%b0%d1%98%d0%ba%d0%b0%d1%82%d0%b0-%d0%ba%d0%be%d1%98%d0%b0-%d/GhgoZrRM8/placeholder.webp?use_watermark=0)