Крушево, 29 декември 2024 (МИА) - Преку 2 000 гости од целава земја очекува Крушево за празниците. Над 90 отсто од приватните и хотелските капацитети се веќе резервирани. Снегот ги зголеми очекувањата, но и радосната празнична атмосфера.

- Може да се пофалиме дека во приватното и во хотелското сместување во Крушево сме резервирани над 90 проценти за новогодишните празници. Оваа година снегот ни дојде навреме, па се очекува бројот на гости да се зголеми и да биде речиси полн за целиот распуст. Се очекуваат нешто повеќе од 2 000 гости за новогодишните празници. Имаме активности и за дневните и за гостите кои остануваат повеќе денови, а најголем број се токму тие. Отворен е веќе скијачкиот центар, вели Мишко Христоски од приватниот сместувачки капацитет во Крушево.

Крушевскиот градоначалник Томе Христоски потврдува голем број гости и богата програма за празниците.

- Постојано се чистат патиштата. Во комуникација сме и со ЈП за државни патишта и сакаме, како и секогаш, на гостите да им понудиме и богата празнична програма и пријатен престој во Крушево, кое нуди бескрајни можности за забава и прошетки во природа. Во функција се и скијачките терении, според снегот, очекуваме и богата зимска туристичка сезона, изјави Христоски.

Вчера официјално беа ставени во функција скијачките терени, работи жичарницата и новина е што се нуди ноќното скијање во Крушево.

- Подготвени сме за сезоната. Имаме бројни резервации, а се надеваме и на успешна скијачка сезона, особено за зимскиот распуст на учениците, вели Жан Здравески-Шапе, угостител од Крушево.

Крушевчани со задоволство и радосно ги очекуваат гостите за новогодишните и за божиќните празници, и за распустот на учениците.ем/ар
Фото:МИА