Штип, 18 јуни 2024 (МИА) - Преку проектот „Зелена енергија за подобра иднина“ се реализираше реконструкцијата на покривната конструкција и поставувањето фотоволтаични панели во клонот во населбата Автокоманда, кој е дел од детската градинка „Вера Циривири-Трена“ во Штип. На денешната завршница на проектот присуствуваше и словенечкиот амбасадор Грегор Прескер. 

Овој проект е од особено значење за градинката, бидејќи придонесува за промовирање на зелена агенда, порача градоначалникот на Општина Штип, Иван Јорданов на денешната прес-конференција.

-Реконструкцијата на покривната конструкција и поставувањето на фотоволтаичните панели ќе овозможи заштеда на електрична енергија, промовирање на зелената агенда. Реконструкција на покривот ќе овозможи во следна фаза реконструкција и на внатрешноста од детската градинка и подобрување на условите за сите дечиња кои се згрижени во неа, рече Јорданов.

Словенечкиот амбасадор Плескар посочи дека со поставувањето на фотоволтаичните панели се придонесува за заштита на околината, а со тоа се подобрува и енергетската ефикасност.

-Навистина ми е мило што денеска го завршивме овој важен проект за општина Штип и за вашата градинка овде. Важно е затоа што со поставувањето на фотоволтаичните панели најпрво ќе придонесеме за заштита на нашата околина и енергетската ефикасност, како и за намалувањето на трошоците на самата градинка. Од друга страна овој проект го опфаќа и едукативниот дел за начините за чување на природата и штедење на енергијата, на ниво на општина и на ниво на вашата државата, рече Плескар.

Проектот е кофинансиран од страна на Република Словенија преку Центарот за меѓународна соработка и развој. вдј/вј/

Фото: МИА