Едно лице загина, а 17 се повредени во престрелка во ресторан во центарот на Приштина
- Полицијата веднаш излегла на местото на настанот и според првичните информации постои сомневање дека некои се повредени од огнено оружје, а други од фрагменти од стакло.
![Едно лице загина, а 17 се повредени во престрелка во ресторан во центарот на Приштина](https://new.mia.mk/index.php/images/20230805100307_big_730x400_64.webp )
Приштина, 5 август 2023 (МИА) - Едно лице загина, а 17 се повредени во пукотница што се случила нешто пред полноќ во барот „Бон Вивант“ во Приштина.
Како што потврдија од косовската полиција, се работи за лица на возраст од 20 до 40 години.
Портпаролот на Регионалната полиција на Приштина, Агрон Боровци, за медиумите изјави дека околу 23 часот и 30 минути било пријавено пукање во кафеана на улицата Реџеп Луча во Приштина, пренесе Бета.
-Полицијата веднаш излегла на местото на настанот и според првичните информации постои сомневање дека некои се повредени од огнено оружје, а други од фрагменти од стакло, рече Боровци.
Тој изјави дека во моментов најмалку две лица се осомничени дека се инволвирани во тој случај, а се откриваат и други можни осомничени. мс/
фото: МИА архива