Евакуирани 3 илјади луѓе во Тајван поради закана од тајфунот Хаикуи
- Се прогнозира дека Хаикуи ќе стигне до планинскиот и ретко населен југоисточен Тајван денеска доцна попладне.
![Евакуирани 3 илјади луѓе во Тајван поради закана од тајфунот Хаикуи](https://new.mia.mk/index.php/images/20230903081504_big_730x400_24.webp )
Тајпеј, 3 септември 2023 (МИА) - Речиси три илјади луѓе се евакуирани, а сите домашни летови се откажани додека Тајван денеска се подготвува за пристигнувањето на тајфунот Хаикуи, кој ќе донесе обилни дождови и силен ветер во јужните и источните делови на островот.
Се прогнозира дека Хаикуи ќе стигне до планинскиот и ретко населен југоисточен Тајван денеска доцна попладне. Во сите градови на споменатиот дел од островот, наставата е откажана, а работниците добија слободен ден.
На граѓаните им се препорачува да избегнуваат излегувања, особено патувања на планина или на брегот, стои во соопштението од Кабинетот на тајванскиот претседател.
Тајван ќе биде погоден од тајфун од категорија 1 или 2, што е послаб од тајфунот Саола што вчера ги погоди Хонг Конг и јужната кинеска провинција Гуангдонг.
Тајванската Влада соопшти дека досега се евакуирани 2.868 жители, главно во јужниот и источниот дел на земјата. Двете водечки домашни авиокомпании, UNI Air и Mandarin Airlines, ги откажаа сите летови за денеска, а откажани се и фериботите до околните острови.
Армијата мобилизираше војници и опрема за да помогнат во евакуацијата на населението, а потоа и во санирањето на последиците од невремето. Откако ќе го помине јужниот дел на Тајван, тајфунот Хаикуи ќе се упати кон Кина. мс/
фото: ЕПА